व्यसनी व्यक्तींमुळे (विशेषतः दारू पिणाऱ्या नवऱ्यापासून) कुटुंबातील इतर सदस्यांना मानसिक, आर्थिक, तसेच शारीरिक त्रास होण्याची शक्यता असते. समाजात अपमानित व्हावे लागते. हिंसक वृत्तीचा नवरा दारू–गांजाच्या व्यसनात अडकलेला असेल, तर त्याच्या बायको व मुलांच्या जीवाला कधीही धोका होऊ शकतो. यांसदर्भात विचार करताना पुढील मुद्दे लक्षात घेऊया.

नवरा, मुलगा, दीर, सासरा, शेजारी, भाऊ, वडील, जावई यांपैकी कोणाच्याही व्यसनापासून स्त्रियांना त्रास होऊ शकतो. अशा वेळी प्रत्येक स्त्रीने स्वतःची पुरेशी काळजी घेतली पाहिजे. दुसऱ्याचे व्यसन जर आपल्या जीवावर बेतणार असेल, तर नात्यापेक्षा आपला जीव महत्त्वाचा आहे हे प्रत्येक स्त्रीने लक्षात ठेवले पाहिजे.

व्यसनी व्यक्ती त्याच्या व्यसनासाठी दुसऱ्याच कोणाला तरी जबाबदार धरत असते. ‘’बायकोच्या वागण्याला कंटाळून व्यसन करायला लागलो.’’ किंवा “बायकोमुळे माझे व्यसन वाढले.” असे बहुतेक व्यसनी पुरुषांच्या बायकांना ऐकावे लागते. दुसऱ्याला व्यसन लागायला किंवा ते वाढायला आपण मुळीच जबाबदार नाही. स्वतःच्या मनाला बजावून सांगा. दुसऱ्याच्या व्यसनाबद्दल स्वतःला मुळीच दोष देऊ नका.

• ती व्यक्ती कधी जास्त व्यसन करते हे शोधा. या काळात महागडे दागिने अंगावर घालणे, स्वतःजवळ पैसे बाळगणे टाळा. आपले पैसे सुरक्षित ठिकाणी ठेवा. घरातील महत्त्वाच्या किंवा किमती वस्तू सहज समोर दिसतील किंवा मिळतील अशा ठिकाणी ठेवू नका.
• घरातली हत्यारे, बागकामासाठी/शेतीसाठी वापरण्याची अवजारे, हत्यार म्हणून मारण्यासाठी वापरता येतील अशा धारदार वस्तू शक्यतो नजरेआड ठेवा. खाटेखाली, एखाद्या बंदखोलीमध्ये, पेटीमध्ये अशा वस्तू ठेवा. न जमल्यास कमीत कमी पडद्याचे किंवा जुन्या कपड्याचे झाकण अशा वस्तूंवर घाला.
• व्यसनी व्यक्तीची दारूच्या नशेत सर्व पैसे खर्च करण्याची वृत्ती असते. स्वत:वरील ताबा गेल्याने पैसे चोरीस जाणे, हरवणे अशा घटनाही घडतात. त्यामुळे अशा व्यक्तीकडून गोडी गुलाबीने पैसे काढून घेण्याचा प्रयत्न करा. व्यसन करण्यासाठी त्या व्यक्तीच्या हातात फार पैसे नसतील, याची काळजी घ्या.
• त्या व्यक्तीचा तुमच्यावर विश्वास नसेल, तर तिने ते पैसे स्वतःच्या हाताने कपाट, पेटी सारख्या बंद ठिकाणी ठेवावे, असे सुचवा.
• व्यसनाधीन व्यक्तीस व्यसनमुक्ती केंद्रात जाण्यास प्रोत्साहन द्या, व्यसन सोडण्यास सहकार्य करा.
• व्यसनाधीनतेतून नेहमी मारहाण, हिंसा होत असेल तर स्वतःच्या आणि मुलांच्या सुरक्षेचे बारकाईने नियोजन करा.